ԳԱԿ վիրտուալ թանգարան

Արվեստաբան Հենրիկ Իգիթյանի կողմից 2009 թվականին հիմնադրված մանկապատանեկան նկարչական համահայկական ամենամյա մրցույթ-փառատոնը Հայաստանի կարևորագույն մշակութային իրադարձություններից է։ 2021 թվականին Գեղագիտության ազգային կենտրոնը, ՀՀ ԿԳՄՍ նախարարության հետ համատեղ, հաջողությամբ վերականգնեց մրցույթ-փառատոնը՝ երկրում համավարակի և պատերազմի հետևանքով առաջացած ընդմիջումից հետո։

Մրցույթ-փառատոնին մասնակցեց ավելի քան 230 պատանի արվեստագետ աշխարհի 10 երկրից՝ Հայաստանից, Ռուսաստանից, Վրաստանից, Ուկրաինայից, Իրանից, Ֆրանսիայից, Արգենտինայից, ԱՄՆ-ից, Կանադայից և Գերմանիայից։ Գեղագիտության ազգային կենտրոնն աջակցեց մասնակիցներին և նրանց ուսուցիչներին՝ տրամադրելով արվեստի տարբեր ուղղություններ ներկայացնող տասը ուսուցողական տեսանյութ, այդ թվում՝ պապիե-մաշե, արծաթագործություն, մանրանկարչություն, թղթե քանդակագործություն, գոբելեն, լինոփորագրություն, խճանկար, ասեղնագործություն և գեղանկարչություն։

Մրցույթ-փառատոնի նորարարական ձեռքբերումներից մեկը վիրտուալ ցուցահանդեսն էր, որը նախագծել և կյանքի է կոչել ճարտարապետ և 3D մոդելավորող Նարեկ Մինասյանը։